2011-04-05

مفهوم الميانة !

السلام عليكم ورحمة الله وبركاته
 بالكويت نسميها " ميانة " , ونقول فلان" يمون " على فلان أو " مطيح الميانة " اي انك تمون عليه
والمقصود فيها انكم تعرفون بعض من زمان وبينكم عيش وملح ومافي داعي للرسميات بينكم
لأنكم بكل بساطة ربع و ... " تمنون " على بعض !

المشكلة عندي في مفهوم الميانة , بما انك صديقي او مثل مانقول بالكويتي " واحد من الربع "
فـ مافي داعي للرسميات بيننا ولو إجتمعنا في دوانية او غيره نكون على سجيتنا ومن غير تكلف او تصنع
ونتكلم ونضحك .. الخ
لكن لاحظت ان للميانة عيوب تناقض هدفها الأساسي
تخيلوا معاي المواقف الآتية :

1- انت في دوانيتك والربع توهم واصلين عندك وناطرين آخر واحد فيكم وتصير السالفة التالية :
الربع : شدعوة ياخي ضيفنا , صب لنا شاي ولا قهوه !
انت : لا والله ! ؟ اشتغل عندكم انا ؟ هذا الشاي وهذي القهوه وكل واحد يخدم نفسه بنفسه !
الربع : ( عن غشمره ) ايييه لو اننا ضيوف جدد جان قمت وفزيت وقعدت تصب هل شاي والقهوه
لكن بما اننا " نمون على بعض " مطنش
( لاحظ ان الميانة صارت نوعاً ما تقليل للإحترام ! )
بعد شوي يدخل صديق لكم ومع واحد اول مره يدخل الدوانية واسمه " محمد "
انت : هلا والله , حياكم الله .. تفضل استريح ( وتقوم بسرعة البرق وتقوم بواجب الضيافة لـ " محمد ! )
الربع : ( كل واحد يطالع الثاني ويقول بقلبه " يعني الحين محمد الي اول مره يدخل هل دوانية صار احسن منا !" )


الموقف الثاني :

2- صديقك  الجديد  الي تعرفت عليه من اسبوع بالكثير " محمد " .. يتصل ويدور الحوار الآتي :
محمد :  السلام عليكم
انت : وعليكم السلام ورحمة الله
محمد : كيف حلاك يا فلان
انت : بخير الحمد لله , منو معاي ؟
محمد : انا محمد الي كنت عندك بالدوانية
انت : هلا والله , كيف حالك ؟
محمد : هلا فيك , تمام والحمد لله
انت : آمرني يا محمد ؟
محمد : ما يآمر عليك عدو والله سمعت انك عبقري بالأنجليزي صحيح ؟
انت : ههههههه عبقري مرة وحدة ! , تقدر تقول امشي الحال
محمد : هههههه , المهم ياخوي انا والله مستحي منك لكن انا فعلاً محتاج مساعدتك
انت : ( تقولها بتصنع وانت لاتعني ماتقول ) افا عليك انا حاضر لاتستحي قول
محمد : والله انا عندي واجب انجليزي للجامعة .. ومو عارف احله وياليت لو تساعدني
انت : (اخوك الصغير قبل شوي طلب منك تدرسه وكان جوابك " اذلف عن ويهي ! " ) اي افا عليك حااضر نتلاقى بالمكان الفلاني ومايصير خاطرك إلى طيب.
محمد : مشكوور والله وماقصرت , اشوفك على خير
انت : مع السلامة .

طبعاً قبل لانقول عادي ومساعدة للناس لاحظ معاي الي صار
لاحظ معاي ايش الي صار , اولاً محمد ما استحى منك نهائياً او خلونا نقول اعتبرك صديق واحتاج مساعدتك وانت ماساعدت اخوك الصغير مع انه اولى من محمد او غيره .. ولو كان الي متصل عليك واحد من الربع الي " تمون عليهم " جان قلت هو بعد " اذلف عن ويهي " تبي تعرف الدليل ؟
شوف الحوار التالي

3- بعد سنه تقريباً على علاقتك مع محمد " طاحت معاه الميانة " وخلاص صار واحد من الربع الي " تمون عليهم "
يتصل عليك ويدور الحوار الآتي:

محمد : سلام يافلان
انت : وعليكم السلام , ها شتبي اخلص !
محمد : شدعوه للحين ما تكلمت ! , على العموم بغيتك بخدمه يابوفلان ( << بوفلان نوعاً ما عشان يرفع من شأنك وتنفذ طلبه )
انت : وليييه قول شتبي خلصني
محمد : والله عندي واجب انجليزي وهل مره فعلاً صعب ومو عارف احل شي .. ابي مساعدتك
انت : ياعمي انا فاضي لك .. انا اخوي الصغير مادرسته وانا واجباتي ماحليتها احل واجبك انت ! " اذلف عن ويهي "
محمد : افاااا طيب ياخي لو فضيت بلغني
انت : ماراح افضى دبر نفسك , واذا طلعتوا اليوم للقهوه دقوا علي
محمد : توك مو فاضي الحين بتروح القهوه ! , ماعلينا مادريت شصار على فلان ؟ .... ( ويكتمل الحوار من سوالف وحش .. الخ )

هذا نفسه محمد الي من قبل سنه سويت له الواجب مع انك ماكنت فاضي ويمكن مشغول اكثر من الحين
طيب ليش ما ساعدته هل مره ؟ .. بكل بساطة لأنك الحين " تمون عليه "

الخلاصة :
ياليت لو يتغير مفهوم الميانه عندنا .. يعني بدل مانطنش ببعض نقوم نساعد بعض اكثر واكثر
وياليت لو نعامل الشخص الي نمون عليه بطريقة افضل من باقي الناس ونبديه علي اي شخص آخر

التعليقات مسموح بها من غير اشتراك او تسجيل الدخول

3 التعليقات:

Amani يقول...

حلو الي كتبته الله يوفقك -اماني

غير معرف يقول...

كلامك صحيح

غير معرف يقول...

هاذا هو حال الدنيا انت ماراح توقف على كل علاقة وتقول شفت وسويت ووالخ واجعل علاقتك مع الناس قلل اصدقاءك (ربعك) وكثر اتصالاتك، مو شرط كل من تعرفنا عليه صار صديق وبالتوفيق.

إرسال تعليق

حدث خطأ في هذه الأداة